Gjatë dy viteve të fundit, lëvizjet në ‘Albpetrol’ kanë qenë të shumta jo vetëm të drejtuesve, por edhe të stafit të administratës. Duket se lëvizjet nuk kanë të ndalur, pasi mësohet se është shkarkuar nga detyra drejtuesi i ‘Albpetrol’, Flamur Mato, i cili zëvendësoi ish-drejtuesin e mëparshëm në krye të kësaj shoqërie, Baftjar Zeqo.
Ky i fundit u dorëhoq nga detyra, pasi kandidoi në listën për deputet të PS-së Fier në zgjedhjet e 25 prillit, ndërsa më pas fitoi edhe mandatin. Baftjar Zeqo qëndroi në këtë post vetëm pak muaj, ndërkohë që kjo detyrë iu besua Flamur Matos, i cili ka mbajtur më parë disa detyra në Bashkinë Fier.
Mato drejtoi për gati 4 muaj shoqërinë aksioniere ‘Albpetrol’, ndërkohë që nuk dihen ende motivet e largimit të tij nga kjo detyrë.
Po kështu, nuk dihet emri i ri që do të drejtojë në vazhdimësi shoqërinë naftënxjerrëse ‘Albpetrol’.
