Demokrati Ibsen Elezi, ka reaguar për herë të parë, pasi u s’kualifikua nga gara për të marrë kreun e PD-së. Ai ka vendosur pikat mbi ‘i’, teksa ka pohuar se ky vendim i ardhur nga Kryesia ishte i pritshëm.
Në një lidhje të drejtpërdrejtë me emisionin “Breaking” në “Top News”, Elezi tha se nuk ka kërkuar mbështetjen e ish-kryeministrit Berisha për të garuar. Duke qëndruar në të njëjtën linjë, ai shton se nuk ka garuar për vota!
Një ditë më parë, Kryesia e Partisë Demokratike miratoi kandidatët për zgjedhjet e 13 qershorit. Në total ishin 9 kandidatë të regjistruar si; Lulzim Basha, Agron Shehaj, Fatbardh Kadilli, Edith Harxhi, Ibsen Elezi, Admir Mulaj, Edmond Vrapi, Sabri Hoxha dhe Mirjan Jashanllari.
Nga 9 kandidatët u miratuan vetëm 4 prej tyre, Lulzim Basha, Agron Shehaj, Fatbardh Kadilli dhe Edith Harxhi.
Qëndrimi publik i Ibsen Elezit:
“E kam pritur këtë në një përqindje të madhe, pasi askush nuk mund të rriskojë që të përballet me të vërteta. Nuk jam kandidat i mbetur në tentativë. Kam thënë që në PD duhet të futen pikëpamjet e djathta. Unë pas lajmeve për Berishën kam reaguar i pari dhe kam mbajtur qëndrim parimor. Askush nuk mund ta ndalojë PD-në, qoftë ish-kryeministri apo kryetari aktual i PD-së.
Nuk kam kërkuar mbështetjen e ish-kryeministrit për të garuar. Nuk kam garuar për vota, por për të arritur për të kuptuar se në çfarë shkalle e mendon Kryesia që mund të kandidoj. Të di a kam përkrahje apo jo”.
Si ju duket gara brenda PD-së?
“Unë përderisa vij nga i njëjti propozim si Harxhi, kjo nuk është e kapur. PD duhet të ketë një reformim të plotë, e kjo vjen nga pikëpamje dhe këndvështrime të ndryshme nga Berisha”.
