GJKKO ka lënë në “arrest shtëpie’ Rovena Vodën dhe dy avokatet Florida Beu dhe Majlinda Hasani. Ish-zv.ministrja e Punëve të Brendshme, Rovena Voda u paraqit sot në ambientet e GJKKO e shoqëruar nga një patrullë policie, të cilët kanë bërë shoqërimin e saj në gjykatë.
Ish-zv.ministrja e Brendshme, Rovena Voda, i premtoi punë në ministri avokates Florida Beut, në këmbim të 2 mijë eurove. Në dosjen hetimore të SPAK, del në pah edhe një bisedë që Beu ka zhvilluar me avokaten nga Durrësi, Majlinda Hasani, e cila ka qenë ndërmjetësja mes Beut dhe Vodës.
Rezulton se Beu i ka dhuruar Vodës një telefon për festën e “8 Marsit”, ndërsa i ka kërkuar të vëllait që t’i japë edhe një arkë me peshk deti, për të cilët shprehet se kushtojnë 300 mijë lekë të vjetra.
Përgjimi:
Majlinda: Jo, jo do ja them unë, e di ajo po e thash unë ka vdek ajo punë, edhe po nuk i dhe ti, e di ajo ja jap nga xhepi im unë.
Florida: A janë për t’u dhënë, a do e bëjë ajo, ajo do e bëjë që do e bëjë
Majlinda: Prit njëherë, ta bëjë, nuk jepen të gjitha përnjëherë, telefonin për “8 Mars” ishte shumë tha ajo e dëgjove, e dëgjove edhe për peshkun që i thash unë peshk deti të shtrenjtë
Florida: E dëgjova, ai me të vret se një arkë që do i çojmë ne, do i them vëllait t’ia bëjë tamam, i shkon 300 mijë lekë. Pse ça kujton ti se është i lirë?
Voda është zbuluar gjatë përgjimeve të prokurorit të Kukësit, Edmond Karriqi, i cili gjithashtu akuzohet se ka marrë 2 mijë euro nga biznesmeni Emirjan Beu. Beu është vëllai i Florida Beut, avokatja nga Durrësi që kërkoi punë në ministri me ndihmën e Vodës.
