Tre vite burg ka caktuar Gjykata e Apelit ndaj shtetasit Ergest Malaj, 23 vjeçari që u arrestua dy vite më parë pasi grabiti 10 milionë lekë (paratë e dasmës) në shtëpinë e hallës së tij.
Vendimi ndaj tij është marrë në datën 14 janar të këtij viti. Malaj ishte dënuar më datë 2 tetor të vitit 2019 me gjashtë vite burg për grabitjen në fjalë, por e kishte apeluar këtë vendim. Apeli vendosi dënimin e të riut me tre vite burg.
Ergest Malaj ishte ftuar në shtëpinë e familjes Bregaj, që ishte edhe shtëpia e hallës së tij. Ai do merrte pjesë në dasmën e djalit të hallës. Malaj ka qëndruar në shtëpi gjatë gjithë kohës së festimeve të dasmës, dhe mësohet se ka pikasur edhe vendndodhjen e parave të ahengut, 10 milionë lekë të vjetra.
Ai u arrestua katër muaj pas grabitjes, por gjithmonë ka mohuar të ketë pasur lidhje me këtë ngjarje. Ergesti deklaronte se kishte qëndruar me gjyshin gjatë gjithë kohës, por gjykata e faktoi me gjurmët e gishtërinjve që gjeti. Malaj ishte futur nga dritarja në dhomën ku ndodheshin paratë, ku kishte lënë gjithashtu edhe gjurmët e gishtërinjve. Familjarët jepnin versione të ndryshme për ngjarjen, por përgjimi i telefonatave i faktoi si dëshmi të rreme.
