Një festë e rëndësishme kombëtare si Dita e Çlirimit, mban ende të ndarë shqiptarët. Të majtët kremtojnë prej 70 e ca vitesh 29 Nëntorin, të djathtët prej vitit 1991 28 Nëntorin.
Të majtët u referohen dokumentave arkivore, dëshmitarëve okularë. Të djathtët kryesisht dokumentave të pas çlirimit, sipas të cilave deri më 1945, komunistët e kremtonin çlirimin më 28 Nëntor. Më pas e zhvendosën festën më 29 Nëntor, për t’i bërë qejfin Jugosllavisë së Titos, e cila kishte këtë datë zyrtare të çlirimit të saj.
Disa studiues pranë së djathtës, e kanë pranuar se “gjermani i fundit” u largua nga Shqipëria më 29 Nëntor. Por sipas tyre kjo nuk mund të kremtohet si një “ditë çlirimi”, por si një ditë “ri-robërimi” e shqiptarëve nga komunistët, që instaluan diktaturën më të egër në Evropë.
Ndërkohë historiani amerikan Bernd Fisher, thotë se Shqipëria u çlirua më 4 dhjetor 1944. Ai i referohet një raporti përfundimtar të ushtrisë gjermane në pranverën e vitit 1945. Fisher thotë se debati mbi 28 apo 29 Nëntorin, mund të zgjidhet duke kremtuar si Ditë Çlirimi, 17 Nëntorin, ditën e çlirimit të kryeqytetit Tiranë.
