Dom Gjergj Meta ka kërkuar lirimin e menjëhershëm të 25-vjeçares Xhuljana Aliaj. Sipas policisë, kjo e fundit u arrestua ditën e sotme nën akuzën e përhapjes së panikut.
Xhuljana kishte shkruar një status në “Facebook”, ku theksonte se kishte rrezik plasjeje depozitash në Porto Romano. Ndërsa iu bënte thirrje banorëve që të largoheshin nga qyteti i Durrësit.
Lidhur me këtë situatë, Gjergj Meta e konsideroi arrestimin e Xhuljanës një veprim të nxituar dhe shproporcionuar.
Reagimi i Dom Gjergj Metës:
Arrestimi i Xhulia Aliaj nga ana e policisë për një status në fb është një veprim i nxituar dhe i shproporcionuar.
Në një vend demokratik një gjë e tillë do të ishte absurde.
U kërkoj autoriteteve dhe uroj që policia ta lërë të lirë menjëherë.
Kam qenë famullitar i saj në Durrës dhe shpreh gjithë konsideratën time për të e ia njoh cilësitë njerëzore dhe civile Xhulias e cila është një qytetare e mirë dhe e don vendin e saj.
Dom Gjergj Meta
