Pak më herët, Ministria e Shëndetësisë bëri me dije se gjatë 24 orëve të fundit janë regjistruar 25 raste të reja me COVID-19 në Shqipëri.
Ndërkohë së fundmi, në mbledhjen e Komitetit të Ekspertëve, mjekët dhe specialistët kanë kërkuar ndërgjegjësim për mbajtjen nën kontroll të epidemisë në vendin tonë.
Drejtuesja e Departamentit të Sëmundjeve Infektive në ISHP, Dr. Silva Bino iu bëri thirrje të rinjve që të jenë të përgjegjshëm:
“Rritja e numrit të rasteve sidomos në Tiranë tregon se sa të kujdesshëm duhet të jemi. Është koha që të rinjtë të jenë të përgjegjshëm, që e gjithë popullata të jetë e përgjegjshme në mënyrë që të ruajmë distancën dhe rregullat e higjienës”.
Nga ana tjetër, Shefja e Shërbimit Infektiv në QSUT, prof. Najada Çomo u shpreh në këtë mënyrë:
“Duhet të jemi realistë që ka persona të shtruar në Spitalin Infektiv që janë në gjendje jo të mirë shëndetësore dhe duke patur parasysh që kemi patur dy vdekje brenda pak ditësh tregon për vazhdimin e gravitetit të sëmundjes, paçka se shifra është nën 20. Por kjo shifër mund të zvogëlohet ose të shtohet në ditët në vijim.
Masat e marra dhe pjesa e ruajtjes së distancimit janë elementë shumë të rëndësishëm për të ruajtur shifrat e ulëta të pacientëve të shtruar në shërbimin infektiv”.
