Kreu i PD-së Lulzim Basha ka udhëzuar deputetët që të zbresin në zonat e tyre respektive, dhe të adresojnë problemet e qytetarëve. Kryedemokrati u ka dhënë porositë e radhës deputetëve, gjatë mbledhjes së grupit parlamentar, që është zhvilluar paraditen e sotme në selinë blu.
“Bëhuni zëri i problemeve të qytetarëve. Zbrisni në zonat tuaja dhe bëni publike shqetësimet e tyre. Rritja e çmimeve është skandaloze, në kushtet e një varfërie që ka përfshirë shumicën dërrmuese të qytetarëve.
Merrni informacion pranë prokurorive për ecurinë e hetimeve, për masakrën zgjedhore të 25 prillit. Duhet bërë transparencë e procesit hetimor që po zvarritet me urdhra politik dhe ndjekur në çdo hallkë të gjyqësorit dhe jo vetëm.
S’mund të pretendohet për drejtesi të pavarur, për sa kohë nuk ndëshkon dhunuesit e procesit zgjedhor. Ne duhet të bëjmë gjithçka për të ndarë politikën nga krimi, me iniciativa ligjore e qytetare dhe denoncuar aferat e përditshme korruptive të qeverisë më të korruptuar të Europës, e ndër më të korruptuarat në botë”.
Sa i takon Reformës Territoriale, Basha u ka kërkuar ligjvënësve: “Nisni konsultimet me qytetarët në zonat tuaja për Reformën Territoriale. Së shpejti do të ngrihet grupi i punës në PD, për të hartuar draftin ligjor”, mësohet të ketë thënë kryedemokrati Basha në mbledhje.
