Një vajzë 21-vjeçare raportohet se është bërë personi më i ri pa sëmundje të tjera shoqëruese, që ka ndërruar jetë nga koronavirusi në Mbretërinë e Bashkuar.
Familja e Chloe Middleton e dha lajmin e trishtë në Facebook me shpresën se kjo do të jetë një “thirrje zgjimi” për të gjithë ata që nuk po i marrin masat kufizuese seriozisht.
Familja nga High Wycombe, Buckinghamshire, natën e kaluar dha një mesazh të rëndësishëm për të gjithë njerëzit, që të kujdesen për veten e tyre, pasi COVID-19 nuk është thjesht një virusi i çfarëdollojshëm.
Nëna, Diane Middleton, shkroi në Facebook: “Për të gjithë njerëzit që mendojnë se është thjesht një virus, ju lutem mendohuni përsëri. Duke folur nga një përvojë personale, i ashtuquajturi virus ka marrë jetën e vajzës time 21-vjeçare”.
Halla e Chloe-s, Emily Mistry, publikoi gjithashtu një lutje në Facebook: “Mbesa ime e bukur, e dashur, 21-vjeçare Chloe ka ndërruar jetë nga Covid-19. NUK KA PASUR PROBLEME ME SHËNDETIN. Të dashurit e mi po kalojnë dhimbjen më të paimagjinueshme, ne jemi copëtuar tej mase. Realiteti i këtij virusi po shpaloset para syve tanë. Ju lutemi, ju lutemi respektoni udhëzimet e qeverisë. Virusi nuk po përhapet, NJERËZIT po e përhapin virusin. Jeta siç e dimë ka ndryshuar në mënyrë dramatike, por nëse të gjithë nuk veprojmë tani për të mbrojtur veten dhe të tjerët, aq më gjatë do të vazhdojë kjo trazirë dhe ky ankth. Pusho në paqe Chloe. Derisa të takohemi përsëri”.