Në ambientet e Kryeministrisë janë mbledhur familjarët e katër viktimave të 21 janarit. Gjatë takimit ka marrë fjalën vajza e njërit prej viktimave në Bulevardin Dëshmorët e Kombit në 21 janarin e 7 viteve më parë, e cila u shpreh se ka besim të Reforma në Drejtësi:
“Historia ka mësuar se popujt në vite besojnë tek drejtësia. Nuk kisha mundësi të shkruaja një letër më herët, por them se besoj tek drejtësia për vdekjen e babait tim. Reforma në Drejtësi është drejt çlirimit. Mezi presim që drejtësia të jetë më afër, ku të ndëshkohen urdhëruesit dhe ekzekutuesit”, tha ajo.
Një tjetër familjar i viktimave falendëroi kryeministrin për mbështetjen që u ka dhënë familjarëve të viktimave, ndërsa tha se asgjë nuk e zëvendëson drejtësinë:
“Kemi vlerësuar qëndrimin pranë të kryeministrit dhe bashkëshortes së tij. Këto e lehtësojnë sadopak dhimbjen tonë, por asgjë nuk e zëvendëson drejtësinë. Përpara nesh qëndron pyetja; përse ndodhi ai krim, përse askush nuk mban përgjegjësi? Bota pyet, si mundet të vriten njerëz ashtu siç u vranë nga qeveria anëtare e NATO-s dhe askush të mos mbajë përgjegjësi”, tha zotëria.
Fjalën më pas e ka marrë kryeministri, i cili tha se plaga e padrejtësisë në këto familje është 7-fish më sunduese:
“Nuk dua ta fsheh, 21 janari vjen në një vigjilje në një sëkëlldi. Kjo peshon ndjeshëm në çdo vit në prag të një takimi tradicional. Pesha e kësaj sëkëlldie ja lë vendin një kthjelltësie pas takimit me familjarët.
21 janari është kthyer në një dëshmitar kombëtar i pa fuqisë çerekshekullore të këtij njeriu përballë drejtësisë së tredhur nga krimi. Një pasqyrë kombëtare të betejës së shpallur tre vitet e fundit të sistemit të drejtësisë, ku në çdo hap ndeshemi nga celula anti reformë. Sot prindërit janë 7 vjet më të moshuar. Plaga e padrejtësisë në këto familje është 7 fish më sunduese”, tha Rama ndër të tjera.
