Pas rastit fatkeq ku 39 persona gjetën vdekjen të mbyllur në kamionin e nisur për në Britani, policia ka arrestuar një shqiptar i cili ofronte kalimin në Angli për vetëm 14,000 paund.
Sipas Daily Mail, shqiptari Kastrijot Ahmati reklamoi shërbimet e tij dhe postoi numrin e vet të celularit në Facebook të quajtur “Shqiptarët në Londër”, e cila ka më shumë se 16,000 ndjekës.
Kështu një reportere e infiltruar e ka kontaktuar dhe ai i tha se mund të paguante 17,000 paund për dokumente “letra false” që do t’i lejonin asaj të fluturonte që nga Tirana.
Ose ajo mund të paguante 14,000 paund e të hynte duke udhëtuar në pjesën e pasme të një kamioni nga Belgjika, duke përshkuar të njëjtën itinerar prej të cilit gjetën vdekjen 39 persona javën e kaluar.
Mësohet se gjatë bisedës me reporteren e infiltruar, në lidhje me rastin e 39 viktimave, shqiptari është shprehur se “është kujt i bie shorti”.
Kujtojmë se shoferi i kamionit, 25-vjeçari, Maurice Robinson, i cili shkoi për të mbledhur kontejnerin, u akuzua mbrëmë me 39 akuza për vrasje dhe komplot për trafikimin e njerëzve.
