Çlirimi i Tiranës nga gjermanët më 17 nëntor 1944, u shoqërua me dhjetëra pushkatime pa gjyq nga partizanët, me urdhër të vetë Enver Hoxhës.
Shumica e viktimave ishin personalitete të njohura të kryeqytetit. Disa kishin qenë shokë të diktatorit në Liceun e Korçës, dhe dinin shumë gjëra mbi rininë e hershme të udhëheqësit komunist.
Sekretari i qarkorit të PK të Tiranës, Gogo Nushi, në letrën drejtuar Hoxhës shprehej:“Me hyrjen e forcave tona janë vrarë 60 vetë. Por mund të jenë mbi 100”. Shumica e tyre u ekzekutuan në mesnatë, duke u qëlluar pas shpine. Në pragun e shtëpisë, në qoshe rrugicash, në breg të lumit, në Sharrë, Priskë dhe Sauk, pa u dhënë asnjë shpjegim, dhe duke i lënë madje edhe pa varr.
Vetëm në bodrumet e hotel “Bristolit”, ku sot ndodhet Muzeu Kombëtar, u pushkatuan 14 persona. Tuk Jakova, një komunist i njohur, raportonte se vrasja pa gjyq e shumë shqiptarëve të pafajshëm, ishte e nxitur nga jugosllavi Dushan Mugosha. Por Enver Hoxha nuk ndalej. “Kush merr kryeqytetin, merr pushtetin!”, shprehej ai.
TIRANA TODAY
