Sikur të mos mjaftonin flakët e zjarrit që kanë përfshirë Greqinë e Turqinë, situata është agravuar edhe me tërmetet.
Qytetarët kanë qenë në panik pas një sërë lëkundjesh, duke rikthyer frikën e muajve të shkuar ku përjetuan një sërë goditjesh. Një “stuhi” tërmetesh ka goditur zonën e Datças.
Sipas mediave turke, janë regjistruar 131 tërmete, më i madhi me magnitudë 5.5 i shkallës rihter. Të gjithë këto lëkundje sizmike janë regjistruar në një hark kohor të 12 orëve.
Edhe në Greqi situata nuk është aspak e mirë, e ndërsa prej ditësh po luftojnë me temperaturat e larta dhe djegien e pyjeve e deri tek zonat e banuara. Pranë zonës së njohur si Peristeri, është shënuar një lëkundje me magnitudë 3.3 të shkallës Rihter.
Greqia për të tretën ditë me radhë po përballet me shuarjen e vatrave masive të zjarrit në thuajse gjysmën e territorit të saj. Mediat vendase bëjnë me dije se janë shkrumbuar mijëra hektarë tokë, shtëpi, makina. Deri më tani janë evakuuar qindra banorë dhe janë lënduar nga flakët 7 persona, mes tyre edhe një zjarrëfikës dhe një vullnetar.
Sa i takon kësaj situate, kryeministri i Greqisë, Kyriakos Mitsotakis është shprehur i shqetësuar se vendi po përballet me një krizë mjedisore për shkak të zjarreve. “Vendi po përballet me një krizë të paparë mjedisore”, ka thënë ndër të tjera ai.
