Kryedemokrati Lulzim Basha bëri thirrje për një reagim mbarëpopullor, me qëllim që t’i jepet fund degradimit ekonomik në vend.
Ai sulmoi qeverinë e kryeministrit Edi Rama, duke e akuzuar atë për thellimin e krizës politike dhe sociale në vend. Ndërsa “shënjestroi” oligarkët, siç i quan ai. Për të cilët tha se po përfitojnë qindra miliona dollarë përmes PPP-ve.
“Qindra miliona dollarë që përfundojnë në duart e 13 oligarkëve që kanë në dorë 13 koncesione, por që në fakt janë skema vjedhje. 146 milionë planifikon t’i jepen nesër 13 njerëzve për PPP, koncesione, kjo do të thellojë krizën por do të rrisë më tej edhe borxhin publik.
Lajmi më i mirë që ndava me FMN është që opozita e bashkuar ka një plan të qartë për ta ndalur menjëherë këto koncesione korruptive, t’i rikthejmë paratë te studentët, universitetet, fermerët. Të rikthejmë konkurrencën e tregut të lirë dhe jo të monopoleve, si dhe duke eleminuar dhjetëra barriera kurthe të fshehura. Një plan që do të mundësojë që biznesi ta ketë qeverinë në krah.
Me planin tonë me vizionin tonë për nesër ne do t’i japim fund kësaj situate. Do të vëmë nën kontroll borxhin publik që ka dalë jashtë kontrollit. Do të rriten pensionet vit për vit, cilësi më e mirë jete për shqiptarët përmes rritjes së fuqisë blerëse, dhe blloku i dytë ka të bëjë me investime që ndihmojnë ekonominë dhe jo fasada. Unë them se në tërësi bashkëbisedimin me misionin e FMN e konsideroj të frutshëm. Tani ka ardhur koha për një reagim gjithëpopullor për ta ndalur këtë,” tha kreu i PD-së Lulzim Basha, në takimin që zhvilloi sot me shefin e misionit të Fondit Monetar Ndërkombëtar, Jan Kees Martinj.
