Aktualisht në Shqipëri janë 1100 mësues të konfirmuar me Covid-19, dhe 1600 nxënës. Përpos situatës së rënduar me pandeminë, shtohet edhe frika për gripin e stinës për shkak të temperaturave nën zero. Por Ministrja e Arsimit, Evis Kushi, sqaron se vendimi për mbylljen e shkollave, nuk është marrë për shkak të situatës së krijuar nga pandemia, por për shkak të parashikimeve për kushte ekstreme të motit në të gjithë vendin.
“Ky vendim nuk ka lidhje me situatën e Covid-19. Edhe këtë situatë po e monitorojmë, sepse ka një rritje të numrit të të infektuarve.
Deri të premten ishin 1100 mësues të konfirmuar me Covid-19 dhe 1600 nxënës. Për herë të parë, më shumë nxënës se sa mësues”, tha ministrja për gazetarët, pas një aktiviteti për Ditën Ndërkombëtare të Arsimit. Megjithatë, ajo shtoi se për momentin nuk janë ende kushtet që shkollat të mbyllen për shkak të Covid-19.
“Kemi qenë të detyruar t’i mbyllim për tri ditë shkollat, për shkak të kushteve të rënduara atmosferike. Kjo lidhet edhe me rrugën që duhet të bëjnë nxënësit deri në shkollë”, tha ajo.
