Plot 11 vjet burg dhe 59 milionë euro. Ky është dënimi që kërkon Prokuroria e Gjykatës Kombëtare të Spanjës. Ish-presidenti i Barcelonës akuzohet për pastrim parash dhe për organizim kriminal.
Dënimi me burg është kërkuar për organizimin kriminal, ndërsa dënimi me gjobë për pastrimin e parave të Konfederatës së Futbollit të Brazilit. Kështu, Prokuroria nuk është ndalur me kaq, por kërkon gjithashtu edhe 7 vjet burg për gruan e Rosell dhe 10 vjet burg për avokatin e tij. Prokuroria bën me dije se ka që nga viti 2006 që Sandro Rosell e ushtronte këtë lloj veprimtarie.
Ish-presidenti i Barcelonës fillimisht po gjykohej për çështjen Neymar, por para se gjykata të jepte verdiktin e saj ai është arrestuar për një tjetër çështje. Policia spanjolle vuri në pranga Rosell me akuzën e pastrimit të parave dhe fshehjes së fondeve, raporton “Marca”.
Arresti i ish-numrit 1 të Barcelonës ka ardhur me kërkesë të SHBA-së e cila ka përfshirë emrin e Rosell në hetimin rreth Rikardo Teikseiras, ish-presidentit të Federatës Braziliane të Futbollit.
Të dy ishin aksionarë në kompaninë “Alianto” dhe me sa duket, kanë fshehur miliona euro duke pastruar sasi të mëdha parash. Në momentin e arrestimit akuza që iu komentua ishte ajo e “mbledhjes së komisioneve të jashtëligjshme, të siguruar nëpërmjet shitjes së të drejtës së imazhit të Kombëtares braziliane të futbollit”.
Këto para, pastroheshin nëpërmjet kompanive të krijuara posaçërisht në parajsa fiskale. Rosell ishte një nëpunës i Federatës Braziliane të Futbollit para se të fillonte punë në stafin drejtues të Barcelonës, derisa u bë president i këtij klubi. Teikseira është bërë pjesë e hetimeve të SHBA rreth zyrtarëve të korruptuar të FIFA-s që arrestuan dy vite më parë në Zvicër.
