Kryeministri Edi Rama ka folur në lidhje me donacionet e siguruara për Shqipërinë në Konferencën e Donatorëve.
I ftuar në emisionin “Real Story” në News24, Rama e cilësoi shifrën e marrë nga Konferenca si një moment të bukur për vendin.
Kreu i qeverisë tha se donacionet i kaluan të gjitha parashikimet. Sipas tij, shifra prej 1.15 miliardë eurosh do të ndihmojë për t’i dhënë spunto planit të qeverisë për zhvillimin ekonomik.
“U tejkaluan edhe parashikimet e mia më optimiste, edhe pse për 2 muaj me radhë i kam kushtuar një vëmendje të veçantë sensibilizimit të të gjithë atyre që mund të na ndihmonin. Kjo që kemi arritur, përtej shumës, është një moment i bukur për Shqipërinë dhe imazhin e saj dhe është një shenjë besimi dhe një arsye më shumë për të besuar që plani që kemi hartuar për t’i dhënë një spunto të re zhvillimit ekonomik, ka një bazë të sigurt sepse kjo na jep mundësi të manovrojmë me më shumë hapësirë në hapat që do hedhim”, tha ai.
