Ish. zëvendës ndihmësi i sekretarit amerikan të Shtetit, Brian Hoyt Yee ka deklaruar se anëtarësimi i disa vendeve të Ballkanit Perëndimor në Bashkimin Evropian deri në vitin 2025 nuk është real.
Gjatë një diskutim në Institutin Ndërkombëtar Republikan në Uashington, zyrtari amerikan tha se bashkësia ndërkombëtare momentalisht nuk ka strategji të qartë për Ballkanin Perëndimor dhe se as BE-ja, as SHBA-ja nuk po ia kushtojnë rajonit rëndësinë që do të duhej.
Sa i përket çështjes së Kosovës, Hoyt Yee u shpreh se takimi i presidentit të Kosovës dhe atij të Serbisë me kancelaren gjermane, Angela Merkel, dhe presidentin e Francës, Emmanuel Macron, nuk është vendimtar për dialogun mes dy vendeve, por është një shans.
“Librat e historisë në Ballkan janë plot me momente ‘tani ose kurrë’. Mendoj se takimi në Berlin nuk është një prej tyre, por është një shans. E vlerësoj Gjermaninë dhe vendet e tjera që vazhdojnë të organizojnë takime të tilla, në të cilat flitet për hapat e ardhshëm”, tha Hoyt Yee.
Ndërkohë, zyrtari amerikan theksoi se ndarja e territoreve në vija etnike nuk është diçka e mirë.
