Policia Greke ka rrëzuar të gjitha pretendimet që minoritari Kostandin Kaçifa të jetë vrarë për flamurin apo të jetë provokuar nga pala shqiptare.
E përditshmja greke “Kathimerini”, por edhe media të tjera të Athinës, citojnë burime zyrtare të Policisë Greke. Ajo thotë se autoritetet e vendit të tyre kanë qenë vazhdimisht në kontakt me palën shqiptare.
Drejtori i Përgjithshëm i Policisë Greke, Aristeidis Andrikopoulos, ka kontaktuar me homologun e tij shqiptar dhe është mbajtur vazhdimisht i informuar për situatën që po ndodhte në Bularat të Gjirokastrës. Edhe burime nga Policia e Shtetit konfirmojnë për tvklan.al se ka pasur komunikim përmes kanaleve zyrtare me homologët grekë.
“Kathimerini” shkruan gjithashtu se burime zyrtare nga Policia e Athinës i kanë thënë se nuk ka prova apo dëshmi që Kostandino Kaçifa të jetë vrarë për ngritjene flamurit greke. Vet policia helene e mohon që 35-vjeçari minoritar të jetë provokuar nga policia shqiptare apo faktorë të tjerë.
Ndërkohë, ambasadori shqiptar në Athinë është thirrur në Ministrinë e Jashtme të Greqisë për episodin që ndodhi në Bularat.
Sikurse shkruan edhe “Kathimerini”, Ministria e Jashtme e Greqisë vazhdon të protestojë për vdekjen e minoritarit grek në Shqipëri, pavarësisht se Policia Greke thotë se ka qenë në dijeni që në fillim të operacionit të RENEA-s dhe mohon që 35-vjeçari të jetë vrarë për uljen e flamurit.
