Lionel Messi nuk do të jetë më pjesë e Barcelonës. Njoftimi ka ardhur nga klubi katalanas, ku zyrtarizoi “divorcin” me yllin argjentinas për arsye financiare.
Lionel Messi dhe Barcelona ndahen pas 18 vitesh. Lajmi i bujshëm vjen drejtpërdrejt nga klubi katalanas, duke shkaktuar surprizën më të madhe të kësaj merkatoje vere, pikërisht atëherë kur mendohej se palët do të gjenin marrëveshjen për rinovimin.
“Megjithëse kishim arritur një marrëveshje mes Barcelonës dhe Leo Messi, dhe me dëshirën e qartë të të dy palëve për të nënshkruar një kontratë të re sot, nuk mund të formalizohet për arsye ekonomike dhe pengesa strukturore (Rregulloret e La Liga në Spanjë).
Duke u përballur me këtë situatë, Leo Messi nuk do të vazhdojë të jetë i lidhur me FB Barcelona. Të dy palët ndjejnë keqardhje që dëshirat e lojtarit dhe klubit nuk mund të plotësoheshin në mënyrë përfundimtare.
Barça dëshiron të falenderojë me zemër lojtarin për kontributin e tij në zhvillimin e këtij klubi, dhe i uron më të mirën në jetën e tij personale dhe profesionale”, shkruhet në komunikatën e katalanasve që zyrtarizoi divorcin.
I dini se cilat janë statistikat e Messit me klubin që shkroi historinë e futbollit? “Pleshti” në total është aktivizuar në 778 ndeshje zyrtare me Barcelonën, ku arriti të realizonte 672 gola si dhe dha 305 asiste.
Në total, Messi fitoi 35 trofe, 10 La Liga, 7 Copa del Rey, 8 Superkupa të Spanjës, 4 Champions, 3 Superkupa Europiane dhe 3 Kupa Bote për klube.