Kryeministri Zoran Zaev zhvillon sot vizitën e parë zyrtare në Bruksel, ku do të takohet me kryetarin e Këshillit të Evropës Donald Tusk, përfaqësuesen e lartë të BE-së, Federika Mogerini, me komisionerin për zgjerim, Johanes Han, si dhe me sekretarin e përgjithshëm të NATO-s, Jen Stoltenberg.
Siç bën të ditur zyra për shtyp e qeverisë maqedonase, qëllimi i takimit të parë në Bruksel pas marrjes së detyrës është konfirmimi i përkushtimit të plotë të qeverisë për integrim në BE e NATO, si qëllim strategjik i vendit.
Zaev do t’i prezantojë prioritetet reformuese në agjendën qeveritare për kthimin e shtetit në planin e integrimeve euroatlantike.
Kryeministri shoqërohet nga ministrja e Mbrojtjes Radmilla Shekerinska, zëvendëskryeministri për eurointegrime Bujar Osmani dhe ministri i Punëve të Jashtme Nikolla Dimitrov.
