Kryeministri i Maqedonisë Zoran Zaev sot uroi kryeministrin e Shqipërisë Edi Rama për fitoren në zgjedhjet parlamentare, por njëkohësisht nuk i kursen lavdet për veten dhe Ramën
“Zgjedhjet demokratike në Republikën e Shqipërisë tregojnë përcaktimin e qytetarëve të Shqipërisë ndaj respektimit të vlerave evropiane, të cilat janë ardhmëria e shtetit, por edhe i mbarë rajonit. Jam i bindur se do të vazhdojë përkushtimi juaj ndaj proceseve demokratike dhe reformuese, sipas standardeve të BE-së dhe NATO-s”, thekson Zaev në urimin e tij.
Besoj, shton Zaev, se do të vazhdojë bashkëpunimi miqësor dhe principiel mes Republikës së Maqedonisë dhe Republikës së Shqipërisë përmes respektimit, mirëkuptimit dhe mbështetjes së ndërsjellë, në interes të sigurimit të jetës cilësore për qytetarët e të dyja shteteve si dhe për zhvillimin e stabilitetit të Ballkanit në tërësi.
“Perspektivat e shteteve të Evropës Juglindore janë në Bashkimin Evropian dhe në NATO dhe me vendosmërinë që e tregojmë si politikanë të përgjegjshëm, jam i bindur se do t’i sigurojmë integrimet e dëshiruara dhe të nevojshme evropiane për qytetarët e shteteve tona dhe të rajonit”, shkruan Zaev në urimin drejtuar Ramës.
