Një pyll në rajonin e Katalonjës, në Spanjë është përfshirë nga flakët si pasojë e temperaturave të larta, 40 gradë, që janë të pranishme në pjesën më të madhe të Evropës.
Mësohet nga mediat spanjolle se janë dërguar qindra zjarrfikëse në përpjekje për të shuar zjarret, ndërkohë nga ana tjetër zyrtarët shprehen se zjarret mund të përhapen shpejt, duke i cilësuar ato me përmasat më të rënda në 20 vitet e fundit.
“Zjarri shpërtheu të mërkurën pasdite në Torre del Espanol në rajonin verilindor të Katalonjës dhe nga e enjtja kishte shkatërruar më shumë se 4,000 hektarë. Vështirësitë janë të tilla që ne nuk mund të flasim për një zjarr që është nën kontroll ose në fazën e zhdukjes, por më tepër se ne jemi në një moment kur zjarri po bëhet më i madh ”, deklaron ministri i brendshëm i rajonit, Miquel Buch.
Nga ana tjetër, Qeveria Rajonale e Katalonjës paralajmëroi se zjarri eventualisht do të gllabërojë 20,000 hektarë, duke e cilësuar gjendjen si një “rrezik ekstrem”.
Gjatë tre ditëve të ardhshme, meteorologët paralajmërojnë se temperaturat pritet të rriten më tej, në shumë vende të Evropës.
Ndërkohë, Gjermania, Polonia dhe Republika Çeke kanë regjistruar të mërkurën temperaturat më të larta ndonjëherë në muajin qershor.
Sipas meteorologëve, shkaktari i motit të tillë në Evropë është vala e të nxehtit nga veriu i Afrikës.
