Mauricio Pochettino, David Beckham dhe Zinedine Zidane kanë ndezur “morinë e thashethemeve” në Angli, pas shijimit të darkës së përbashkët në një restorant të Londrës…, pastaj edhe duke u larguar nga dera e pasme, njëri pas tjetrit, brenda disa sekondave.
Kjo “trio”, tre prej emrave më të mëdhenj në futbollin botëror, u “kapën mat”, duke dalë nga restoranti “Locanda Locatelli”. Trajneri i Tottenham, Pochettino, dhe Zidane kanë qenë të lidhur shumë me stolin e Manchester United këtë sezon, pas largimit të Jose Mourinho.
Po ashtu, argjentinasi, 48 vjeç, vijon të mbetet një nga favoritët më të mëdhenj për të marrë drejtimin e Real Madridit, ku Beckham dhe Zidane ishin shokë ekipi, ndërsa francezi bëri edhe trajnerin deri verën e kaluar.
Legjenda e Manchester United dhe Real Madridit, Beckham, u bashkua në këtë darkë i shoqëruar nga shoku i tij i ngushtë, Dave Gardner. Pochettino dhe ndihmësi i tij te “Spurs”, Jesus Perez, gjithashtu shfrytëzuan mundësinë e një nate të rrallë, duke vizituar teatrin “West End”.
Treshja në fjalë kaloi një mbrëmje relaksuese së bashku, përpara se të dilnin nga dera e kuzhinës dhe jo ajo kryesore e restorantit, në orën 10:55. Becks dhe Zidane, shokë në skuadrën e famshme “galacticos”, janë ende miq të ngushtë dhe ruajnë raporte mjaft të mira me presidentin Florentino Perez.
Edhe ata u larguan nga dalja e kuzhinës. Zidane i pari, në orën 10:52, pastaj Beckham dhe Gardner dolën vetëm një minutë më vonë. Beckham dhe Zidane besohet të jenë në Londër për të filmuar një reklamë për “Adidas”. Njerëzit e zakonshëm kanë fërkuar sytë, kur kanë parë në derën e pasme të restorantit duket dalë tre emra të mëdhenj të futbollit, në harkun e tre minutave, në një natë të qetë të muajit shkurt.
