Këshilltari Juridik i PD, njëherësh ish-ministër teknik i Drejtësisë, Gazmend Bardhi, ka deklaruar sot se sulmi ndaj prokurorëve është pjesë e skenarit të Edi Ramës, për të shantazhuar drejtësinë. Ai i referohet zhvillimeve të fundit në Prokurorinë e Krimeve të Rënda, ku ndaj 10 prokurorëve me urdhër të kryeprokurores Arta Marku, nisi një hetim disiplinor, ndërkohë që 3 prej tyre kjo e fundit i transferoi në rrethe.
Duke u ndalur tek transferimi i prokurorit të Krimeve të Rënda, Besim Hajdarmataj në Pogradec, Bardhi tha: “Transferimi i njërit prej prokurorëve dhe procedimi i tjetrit prokuror të dosjes Tahiri, është mesazh i qartë për drejtësinë. Kush punon kundër bandave të lidhura me pushtetin, ndëshkohet dhe largohet”.
Më tej ai shtoi: “Arta Marku është e vetëdijshme se përse është në atë pozicion, në mënyrë krejt të paligjshme. Është aty për t’i mbyllur gojën të gjithë atyre që luftojnë padrejtësinë”.
Sipas Bardhit, “Shpërbërja e grupit që po heton Tahirin, është veprim kriminal, e kjo duhet të hetohet menjëherë”.
