Pas zhurmës mediatike lidhur me vilën e re luksoze të Bashës, vetë kryedemokrati ka zgjedhur që ti japë fund heshtjes. Gjatë takimit me të rinjtë në Korçë, ai e ka cilësuar si një gënjeshtër të kryeministrit Rama. Që sipas tij, ka për qëllim të heqë vëmendjen nga skandalet dhe dështimet e qeverisë. Ai shtoi më tej se ka nisur këtë tur takimesh nëpër Shqipëri me rininë, për të diskutuar të vërtetën e hidhur.
“Nuk ka gënjeshtër që mund të më heqë nga detyra ime. Gënjeshtrat kundër meje dhe familjes time, janë një përpjekje cinike e Edi Ramës. Për të hequr vëmendjen nga lista e gjatë e dështimeve dhe e skandaleve të tij.
Prandaj, nuk bëhem pjesë e kësaj loje. Por siç e shikoni, jam në një tur takimesh me rininë, me qytetarët për të diskutuar të vërtetën e hidhur, jo gënjeshtrat e qeverisë. Dhe mbi të gjitha, për të diskutuar rrugët e daljes, zgjidhjes nga kjo krizë”, tha Basha.
Kreu i PD-së është zhvendosur në një nga zonat më të shtrenjta, në periferi të Tiranës. Vilat në këtë zonë janë kryesisht dy katëshe, me pishinë. Në këtë zonë jetojnë diplomatë, bankierë dhe personazhe të njohura të biznesit.
