Sot pritet të mblidhet Këshilli Politik për Reformën Zgjedhore, ku pritet të marrin pjesë përfaqësues të klasave politike si nga mazhoranca ashtu edhe nga opozita jashtëparlamentare.
Duket se marrëveshja e arritur për Zgjedhoren po fillon të japë frytet e saj të bashkëpunimit dhe ky është hapi i rradhës i politikës për të dialoguar në tryezë për një nga kushtet e Bundestagut për çeljen e negociatave.
Mësohet se demokratët do të përfaqësohen nga Oerd Bylykbashi, ndërsa LSI nga Petrit Vasili. Në këtë tryezë diskutimi do të përfshihen edhe aleatëte tyre si Mesila Doda nga PDIU, Fatmir Mediu nga Partia Republikane dhe kreu i PBDNJ-së, Vangjel Dule.
Ndërkohë nga maxhoranca do të marrin pjesë bashkëdrejtuesit e Komisionit Parlamentar të Reformes Zgjedhore Damian Gjiknuri dhe Rudina Hajdari.
Po ashtu pjesë e tryezës do të jetë dhe anëtari i grupit parlamentar të PS, Ervin Bushati, ndërsa nga grupi parlamentar demokrat, Myslim Murrizi si dhe përfaqësues i grupit të pavarur parlamentar Nimet Musai.
