Pas përfundimit të mbledhjes së Këshillit Politik për Reformën Zgjedhore, përfaqësuesi i Partisë Demokratike Oerd Bylykbashi deklaroi se mazhoranca po tenton për votim të njëanshëm.
Bylykbashi i kërkoi mazhorancës që në takimet e ardhshme të paraqesë qëndrime konkrete, gjë e cila sipas tij, do të ndihmonte që Reforma Zgjedhore të mbyllej brenda muajit maj.
“Ajo që ngulëm këmbë është se para se të ecim më tutje duhet të jetë e qartë se cili është vullneti i mazhorancës mbi propozimet e opozitës lidhur me një çështje madhore.
Brenda 31 majit Reforma Zgjedhore duhet të përmbyllet. Deklaratat e Gjiknurit tregojnë mungesën e vullnetit politik të mazhorancës për të bërë një punë të bazuar në konsensus.
Ne kërkojmë shprehjen e qartë nga mazhoranca, cili është vullneti i saj politik lidhur me çështjet e mëdha që shtron OSBE, për të cilat opozita ka bërë propozime konkrete.
Është mazhoranca që deri më sot nuk ka dhënë asnjë përgjigje në lidhje me çështjet e shtruara, por vetëm refuzime. Është mirë që mazhoranca pa humbur kohë në mbledhjen e radhës të vijë me qëndrime konkrete”, u shpreh Bylykbashi.
