Deri më tani mësohet që procesi i votimit të ketë përfunduar në 10 nga 61 Bashkitë e vendit.
Në Bashkitë Pustec, Fushë Arrëz, Memaliaj, Himarë, Belsh, Polican, Libohovë, Konispol, Kolonjë dhe së fundmi Devoll, janë mësuar tashmë fituesit edhe pse në shumicën prej tyre rezultati dihej, pasi kishte vetëm një kandidat në garë.
PUSTEC
Partia socialiste merr drejtimin e kësaj bashkie për herë të parë pas 12 vitesh. Pali Kolevski ka fituar me 645 vota më shumë se konkurrenti i tij, kreu aktual i bashkisë në Pustec, Edmond Themelko.
MEMALIAJ
Gjolek Guci i Aleancës për Shqipërinë Evropiane u shpall fitues pasi ishte edhe kandidati i vetëm në garë. Kandidati i Partisë Socialiste për këtë bashki ka marrë gjithsej 4,206 vota.
FUSHË ARRËZ
Edhe në këtë bashki, nuk pati ndonjë surprizë pasi kandidati i PS-së, Fran Tuci ishte i vetëm në listën e konkurrimit. Kandidati i Partisë Socialiste për këtë bashki ka marrë gjithsej 2,462 vota.
HIMARË
Kandidati i koalicionit Aleanca për Shqipërinë Evropiane, Jorgo Koro rizgjidhet për herë të tretë në krye të kësaj bashkie me 4,209 vota.
KOLONJË
Erion Isai, kandidati i PS-së, ka arritur të grumbullojë 4,279 vota, ose përkthyer ndryshe në 93.37% të votave të përgjithshme duke fituar zgjedhjet në këtë bashki.
LIBOHOVË
Luiza Mandi është kryetarja e re e kësaj bashkie, ku pas numërimit të 12 kutive ajo fitoi duke marrë 1,275 vota.
KONISPOL
Kryetari aktual i kësaj bashkie rikonfirmon edhe një herë tjetër fitoren e tij. Nga 17 kuti votimi të numëruara, Shuaip Beqiri ka siguruar 3,328 vota.
BELSH
Arif Tafani rizgjidhet sërish në krye të bashkisë, ku nga 41 kutitë e numëruara, ai ka arritur të sigurojë 6,377 vota.
POLIÇAN
Në Poliçan, fitues u shpall kandidati i vetëm në garë Adriatik Zotkaj me 4681 vota
DEVOLL
Kandidati i PS, Eduart Duro, ka fituar me 6304 vota, përballë tre kandidatëve të tjerë, që ishin në garë.
Përkatësisht, për Bashkinë e Devollit garonin edhe kandidati i pavarur Fezi Shaholli, i cili ka siguruar 648 vota, Ylli Cenkolli i FRD me 242 vota dhe Artur Korpollogu i “Shpresa për Ndryshim” me 341 vota. Kujtojmë që Bashkia e Devollit drejtohej nga kryebashkiaku i Partisë Demokratike, Bledjon Nallbati.
Nga të dhënat e deritanishme, Pusteci ishte bashkia me pjesëmarrjen më të madhe të votuesve me 55.44% ose 7724 votues.
Kujtojmë se nga të dhënat zyrtare të publikuara nga KQZ, ditën e djeshme në Shqipëri votuan 771 863 qytetarë apo e përkthyer në përqindje, 21.6% e popullsisë. Zgjedhjet lokale u zhvilluan në 61 bashki për këshillin dhe kryetarët në mbarë vendin. Gara zhvillohej vetëm në 30 bashki, pasi në 31 bashkitë e tjera PS ishte e vetmja me kandidatë pjesëmarrës. Nga të dhënat, mes 97 kandidatëve për kryebashkiakë, vetëm 10 janë zonja, ndërsa 23 prej socialistëve janë rikandidime.
