Kreu i Komisionit Zgjedhor ë PD-së, Jemin Gjana ka dalë në një konferencë për shtyp, ku ka dhënë detaje lidhur me procesin e zgjedhjes së kreut të Partisë Demokratike, i cili do të zhvillohet të shtunën më 22 korrik.
Gjana foli për komisionet e votimit dhe për listat, ku dha numra konkretë për votuesit demokratë, teksa tha ka 5 komisione votimi më shumë se numri i degëve, për arsye se 5 degë të PD-së për efekt të numrit të madh të anëtarësisë do të kenë nga dy komisione.
Gjithashtu, Gjana tha se janë shtuar 1.500 anëtarë në listat përfundimtare, të cilët janë paraqitur me karta anëtarësie, por nuk i kishin përditësuar ato.
“Është përcaktuar përbërja e 73 komisioneve të votimit, ku ka 5 komisione votimi më shumë se numri i degëve për arsye se 5 degë të PD-së për efekt të numrit të madh të anëtarësisë do të kenë nga dy komisione.
Kanë nga 73 përfaqësues të propozuar nga kandidatët në garë, ndërsa dje komisioni mori vendimin edhe për listat përfundimtare të votimeve. Regjistri elektronik përmban 103 mijë e 200 anëtarë. Sot listat kanë në total 103 mijë e 900 autorë. Janë shtuar 1.500 anëtarë në listat shtesë nga persona që janë paraqitur me karta anëtarësie, por që nuk i kishin përditësuar. Janë shtuar 112 anëtarë në 5 degë të PD-së. Janë hequr nga regjistri elektronik 607 anëtarë që kanë kaluar nga subjekte të tjera politike ilegalisht.
Në listën përfundimtare të votimit janë të përfshirë dhe 3 kategori anëtarësh. Janë anëtarë të degëve të PD-së në Selanik, Romë, Londër etj. Janë regjistruar nga 2014 online si të tillë dhe disa mijëra anëtarë të larguar në emigracion 3 vitet e fundit. Janë rreth 23 mijë anëtarë. Do të mbeten në listat e PD-së pavarësisht mundësive për të qenë pjesë e proceseve në parti. Sot do të dërgohen zyrtarisht listat e komisioneve të votimit dhe vendet e votimit, si dhe listat përfundimtare të votuesve”.
