Presidenti serb, Aleksandar Vuçiç është shprehur se zgjedhjet kombëtare po zhvillohen në një atmosferë demokratike.
Pasi votoi, Vuçiç shprehu për mediat kënaqësinë e tij për procesin e votimit.
“Nuk ka pasur parregullsi serioze. Zgjedhjet po zhvillohen në një atmosferë demokratike. Ka pasur më pak incidente se kurrë më parë në epokën e demokracisë sonë shumëpartiake, parlamentare”, tha Vuçiç, i cili udhëheq koalicionin “Për fëmijët tanë”.
Edhe pse në kohë pandemie, mbi 6.5 milionë votues po hedhin votat e tyre në Serbi në zgjedhjet parlamentare, lokale dhe rajoneve autonome.
Mbi 8 mijë qendra zgjedhore, të cilat u hapën në orën 7 të mëngjesit, do të jenë të hapura deri në orën 8 në mbrëmje.
Mediat vendase bëjnë me dije se maskat mbrojtëse dhe dorezat janë të detyrueshme për anëtarët e komisionit të qendrave të votimit. Sipas të dhënave të Komisionit të Zgjedhjeve të Republikës, deri në mesditë jehona e votuesve ishte 18,1 për qind.
Rreth 140 vendvotime janë hapur edhe në Kosovë për zgjedhjet në Serbi. Kreu i Komisionit Qendror të Zgjedhjeve tha se në Kosovë kanë të drejtë vote rreth 100 mijë qytetarë.
