Kandidatja për kreun e Partisë Demokratike, Edith Harxhi beson se kryedemokrati Lulzim Basha ka shanse të vogla për të rimarrë drejtimin e kësaj force politike, për 4 vitet që vijnë.
Në një intervistë për ”ABC News”, Harxhi u shpreh se platforma e saj është e ndarë në 3 shtylla, teksa shtoi se grupimi për PD-në, do të vijojë edhe pas zgjedhjeve të 13 qershorit.
Ajo u bëri thirrje për hapjen e PD-së, dhe nëse ajo bëhet kryetare, figurat e njohura që janë larguar, do të kenë një ftesë për t’iu ribashkuar partisë.
Edith Harxhi: “Fraksion nuk ka në PD. Megjithatë grupimi do të vijojë njësoj si sot, nëse do të fitojë Basha. Por unë besoj që i ka shanset e vogla. Ne këtë projekt që e kemi nisur tani, është një projekt që do të vijojë. Ne do vazhdojmë siç kemi nisur. Kjo nuk është betejë që mbaron me 13 qershor. Platforma ime për PD, është e ndarë në tre shtylla. Ajo ideologjike, nuk është bërë mjaftueshëm për të persekutuarit. Duhet që çdo zyrtar i PD të kalojë në filtrin e instucionit të dosjeve të sigurimit të shtetit. Duhet bërë dëmshpërblim i plotë i krimeve të komunizmit. Çështja e pronarëve të ligjshëm, të trajtohet urgjentisht nga PD.
Çdo regjim, janë sjellë shumë rëndë me pronarët e ligjshëm. Afrimi i shtresës së mesme, intelektualëve, akademikëve. Trajtimi i rinisë. Duhet t’u përqasemi në një mënyrë krejt tjetër. Hapja e partisë. PD duhet të hapet urgjentisht, të bashkojë gjitha vlerat e të gjitha kohërave. U bëj thirrje atyre që u larguan ose i kanë larguar, nuk mund ta bashkojë Basha, se u mbylli derën. Qëkur të ndryshojë vizioni në PD, Rama është gjysmë i mundur. Ne do të kemi departamente dhe zyra që do të punojnë ditë e natë për çdo projektligj që shkon në parlament, për të pasur një alternativ.”
