Komisioni Shtetëror i Zgjedhjeve në Maqedoninë e Veriut, ka shpallur të mbyllur votimet për zgjedhjet e parakohshme parlamentare, të cilat janë zhvilluar sot nga ora 07:00 deri në orën 21:00. Bujar Osmani i BDI-së, pas mbylljes së procesit zgjedhor në Maqedoninë e Veriut, deklaroi se partia e tij është krenare “për një fushatë të fuqishme për kryeministrin e parë shqiptar në Maqedoninë e Veriut”.
“Pjesëmarrja e lartë është shenjë e fortë për demokracinë tonë. Vlerësoj punën e komisionerëve të cilët garantuan proces të sigurt zgjedhor për qytetarët. Dua të shpreh mirënjohje edhe për aktivistët tanë.
Megjithëse presim ende rezultatet, jemi krenar për fushatën tonë. Nga ajo që dimë jemi të bindur se kemi arritur qëllimin tonë për të sjellë BDI-në në pozitë, për të realizuar kërkesën tonë. Falenderojmë qytetarët për besimin dhe votën e tyre”.
“E pranojmë këtë përgjegjësi për të përmbushur premtimet tona. Nga nesër do të fillojnë aktivitetet me palën maqedonase, për formimin e një qeverie të udhëhequr nga një kryeministër shqiptar. I ftojmë edhe partitë tjera të na bashkëngjiten në këtë kauzë. Presim fitore, por këto zgjedhje do të mbahen mend për fitoren e shqiptarëve”, tha më tej ai.
