Në raundin e dytë të zgjedhjeve lokale në Maqedoni vihet re një pjesëmarrje më e madhe e qytetarëve për të votuar për krerët e komunave, krahasuar me raundin e parë.
Kështu rezulton bazuar në të dhënat e mbledhura për sa i përket procesit të votimit deri në orën 13:00, ku pjesëmarrja është si më poshtë:
Bërvenicë 19,45%; Bogovinë 21,03%, Çair 22,14%, Dibër 18,74%, Gostivar 19,43%, Likovë 17,16%, Saraj 22,24%, Studeniçan 20,34%, Tearcë 17,70%, Tetovë 19,63%, Vrapçishtë 19,81% dhe Zhelinë 22,68%.
Ndërkohë, siç numri më e madhe i votuesve në komunat me shumicë shqiptare është regjistruar në Zhelinë 22,68%.
833.716 qytetarë me të drejtë vote do të zgjedhin kryetarët e rinj të komunave, të cilët do të votojnë në 1,517 vendvotime.
Ndryshe nga rrethi i parë i zgjedhjeve të mbajtura më 15 tetor, kur u votua edhe për këshillat komunale dhe qytetin e Shkupit, tani votohet vetëm për kryetarë të komunave, që kaluan në balotazh ndërmjet dy kandidatëve që kanë marrë më shumë vota në rrethin e parë të zgjedhjeve.
Kandidati që do të marrë të paktën edhe një votë më shumë, do të udhëheqë komunën edhe katër vite të ardhshme.
Në rrethin e parë qytetarët e kanë zgjedhur fatin e tyre për të parin e komunës në 45 komuna, ndërsa tashmë në garë janë 68 kandidatë të 8 subjekteve politike dhe 2 kandidatë të pavarur.
Beteja kryesore zhvillohet kryesisht në komunat shqiptare, konkretisht për komunat e Çairit në Shkup, Tetovë, Gostivar, Strugë, Dibër, si dhe komunat tjera që janë në zonat rurale.
Beteja zhvillohet mes kandidatëve të BDI-së, e cila ka mbështetjen e LSDM-së dhe atyre të koalicionit Aleanca për Shqiptarët dhe Lëvizja Besa.
