Zgjedhjet në FSHF për herë të parë kanë pasur një konkurrencë kaq të lartë dhe kjo ka bërë që një mori skandalesh të dalin në dritë. Kandidatët Bashkim Fino dhe Armand Duka janë përballur “egërsisht” me njëri tjetrin duke u përpjekur ti ulin sa më shumë pikë kundërshtarit, ndërsa kandidati Shpëtim Hala ka qenë i distancuar nga këto skandale dhe ka zgjedhur të bëjë një garë më sportive.
Skandali i fundit që bëhet publik nga Gazeta Tema është manipulimi që ka bërë presidenti Armand Duka me të dhënat e UEFA-s sa u përket trajnerëve të licencuar nga institucioni duke bërë mashtrimin e radhës për publikun. Në një postim në Facebook, ai është përpjekur të renditë sukseset në këtë fushë të institucionit që drejton prej 16 vitesh.
“EDUKIMI dhe kualifikimi i trajnerëve të të gjitha kategorive, një prioritet i veçantë. Prej vitit 2004, programet trajnuese të aplikuara nga Sektori i Edukimit në #FSHF kanë mundësuar një rritje cilësore të nivelit të trajnerëve të të gjitha kategorive në Shqipëri.
Përmes licencimit në të gjitha kategoritë, nga UEFA PRO e deri te NATIONAL C, trajnerët shqiptarë fitojnë mundësinë për të punuar në çdo vend të botës në kategorinë e tyre”, shkruan Duka, duke shoqëruar këtë postim me shifrat sipas kategorive.
Por gjithçka është një mashtrim i madh dhe i turpshëm, nëpërmjet të cilit kreu i FSHF-së ka guxuar deri në pikën sa ka manipuluar të dhënat zyrtare që disponon UEFA. Sipas Dukës, gjatë këtyre viteve, trajnerë me UEFA Pro në Shqipëri rezultojnë të jenë 112, ndërsa të dhënat zyrtare të UEFA-s të publikuara në raportin e saj të fundit, tregojnë për 86 trajnerë të licencuar në këtë kategori.
Shifrat e publikuara nga Duka flasin për 376 trajnerë me UEFA Pro, ndërsa UEFA njeh vetëm 290 të tillë. Sipas Dukës, FSHF ka licencuar 950 trajnerë me UEFA B, ndërsa ndërkombëtarëve u dalin në llogari vetëm 577 të tillë. Shifrat janë ndryshe edhe me licencën National C, ku sipas të dhënave të Dukës, janë të licencuar 194 trajnerë, ndërsa për UEFA-n janë 190 të tillë. Këto mospërputhje tregojnë në rastin më të mirë tentativën për të fryrë shifrat, e në rastin më të keq, pajisjen pa autorizimin e UEFA-s të personave me licencat e trajnerëve ndërkombëtarë.
Gjithsesi, statistika më absurde dhe mashtrimi më i madh mbetet me krahasimin që Duka bën me periudhën para se ai të merrte drejtimin e FSHF-së. Sipas tij, para asaj periudhe nuk ka pasur trajnerë të licencuar nga UEFA, ndërsa është arritje e madhe se në drejtimin e tij janë licencuar 1632 të tillë. Por Duka ka bërë krahasim me një periudhë kur licencimi nga UEFA për trajnerët NUK KA EKZISTUAR.
Sistemi për licencat ndërkombëtare u vu në aplikim nga UEFA në vitin 1998 dhe deri në vitin 2000, të drejtën për t’u pajisur me to e kishin vetëm trajnerë nga 6 vende: Itali, Gjermani, Angli, Spanjë, Francë dhe Zvicër. Më pas filloi aplikimi në vendet e tjera. Shqipërisë kjo e drejtë iu dha në vitin 2004, duke organizuar kurset e para. Ndaj kjo ishte një tjetër tentativë e dështuar e kreut të institucionit për ta interpretuar si arritje të madhe të tijën diçka për të cilën nuk mund të ekzistonte asnjë lloj krahasimi.
