Pas lojtarëve të kombëtares apo funksionarëve të tjerë në FSHF, kanë dalë hapur edhe arbitra që tregojnë mbështetjen për kandidatët e zgjedhjeve në Federatë. Skandali i shoqatave fantazmë është një tregues se zgjedhjet nuk do të jenë të ndershme, ose më saktë edhe nuk kanë qenë të ndershme në vitet e fundit. Pasi anëtarët e shoqatave kanë votuar që në 2010-ën dhe të regjistruara tek noteri publik(që nuk mjafton, pasi duhen regjistruar në gjykatë) figurojnë të regjistruara në vitin 2011.
Supozohet që zgjedhjet të paktën në futboll të jenë të lira dhe të fitojë sporti ose platforma më e mirë. Njerëzit që kanë një punë në FSHF nuk kanë pse të mbajnë qëndrime për mbështetjen e kandidatëve, si ç’po ndodh tani me disa gjyqtarë futbolli.
Mjafton t’i hedhësh një sy statusit të postuar në Facebook nga kreu aktual i FSHF-së, Armand Duka, i cili shpallte kandidaturën për një mandat tjetër për president të Federatës. Këtë status nuk kanë nguruar ta shpërndajnë në profilet e tyre në Facebook edhe pesë gjyqtarë futbolli, të kategorive të ndryshme.
Sigurisht që strategjia është e rafinuar, sepse nuk bëhet fjalë për gjyqtarë të Superligës, të cilët i njohin të gjithë, por për arbitra pak të dalë në skenë, të cilët gjykojnë ose në kategorinë e moshave ose në Kategorinë e Parë dhe të Dytë: Florian Lata, Olti Shkëmbi, Nikolaos Soko, Roland Paramoni dhe Heraj Lisaku.
FSHF pretendon se sektori i gjyqtarëve është i pavarur dhe normalisht ata nuk duhet të dalin në qëndrime të tilla nëse janë profesionistë të vërtetë. Por në rast se vendi i punës mbahet nga mbështetja e Federatës, atëherë ky përbën skandal dhe janë plotësisht të varur nga kreu i FSHF-së. Mjafton të kujtohet mesazhi që iu dërgohej gjyqtarëve për të ndjekur me çdo kusht ndeshjen e Shpresave në “Selman Stërmasi” pak muaj më parë, sigurisht për të mbushur shkallët e impiantit sportiv, raporton “Tema TV”.
Tashmë del edhe një tjetër element, pikërisht përdorja (me vetëdije apo jo, me detyrim apo me dëshirë) e gjyqtarëve për të shpërndarë statusin e kreut aktual të FSHF-së, Armand Dukës, i cili shpall kandidaturën për një tjetër mandat.
