Është diskutuar shumë në ditët e fundit se përfshirja e Bashkim Finos në garën e FSHF-së mund të sjellë pasoja jo të mira për futbollin, pasi FIFA ka rregulla të qarta. Për këtë arsye Fino ka dhënë dorëheqjen nga çdo funksion politik dhe e ka komunikuar me anë të një statusi në faqen e tij zyrtare në “Facebook”.
Kjo mund të jetë gara më e fortë e FSHF-së që kemi parë ndonjëherë, pasi të dy kandidatët cilësohen të fortë. Skandalet që kanë dalë në ditët e fundit në lidhje me “shoqatat fantazmë” kanë ulur disi reputacionin e Presidentit aktual. Për këtë temë ka pasur edhe një reagim të fortë një ditë më parë nga ish-kryeministri, i cili u shpreh se do ti çonte para ligjit të gjithë ata që kanë gisht në këtë falsifikim.
“Pavarësisht se nuk jam i detyruar ligjërisht, sapo i paraqita dorëheqjen Kryetarit të Partisë dhe Sekretarit të Përgjithshëm nga funksioni i sekretarit organizativ dhe administrativ të Partisë Socialiste. Ky akt, vjen për të evituar çdo paragjykim, për një garë të drejtë dhe të ndershme, në kuadër të kandidimit tim për postin e presidentit të FSHF.”
Bashkim Fino
