Presidenti francez Emmanuel Macron do të takohet të martën me kundërshtarët politikë, pasi koalicioni i tij nuk arriti të fitojë shumicën në zgjedhjet parlamentare. Macron tani është nën presion për të siguruar mbështetje nga rivalët, për të përmbushur axhendën e reformave të qeverisë së tij.
Por as e djathta ekstreme e Marine Le Pen dhe as aleanca e majtë-jeshile e Jean-Luc Mélenchon, nuk janë të prirur të punojnë me të. Qeveritë e pakicave janë një gjë e rrallë në Francë, dhe aleanca e Ansamblit të zotit Macron ka 44 vende larg shumicës.
Kjo do të thotë se atij do t’i duhet të gjejë mbështetje nga deputetët kryesorë nga ana e majtë dhe e djathtë e politikës, për të ndihmuar në ndërtimin e një mazhorance pune. Përfaqësuesit e partive do të vizitojnë pallatin Élysée veçmas, për bisedimet e nivelit të lartë të martën dhe të mërkurën.
Analistët thonë se presidenti mund të jetë duke kërkuar një marrëveshje me republikanët e krahut të djathtë, dhe partia konfirmoi se udhëheqësi i saj, Christian Jacob, do të marrë pjesë në bisedime.
Zonja Le Pen do të marrë pjesë, por z. Mélenchon jo, raporton agjencia e lajmeve AFP. Kreu i Partisë Socialiste Olivier Faure dhe shefi i Partisë Komuniste Fabien Roussel, anëtarë të aleancës së krahut të majtë Nupes, do të takohen gjithashtu me Macron.
E djathta dhe e majta ekstreme e Francës bëjnë përparime
Qeveria centriste e Francës po përpiqet dëshpërimisht të shmangë paralizën politike, pasi humbi shumicën e saj, me disa komentues që paralajmërojnë se Franca bëhet e paqeverisshme. Macron do të duhet gjithashtu të zëvendësojë tre ministra që humbën vendet e tyre në votimin e së dielës, dhe e ardhmja e kryeministres Elisabeth Borne duket gjithnjë e më e kërcënuar.
Zgjedhjet e së dielës panë një pjesëmarrje të ulët, me një përqindje abstenimi prej 53%. Presidenti Macron ka paraqitur një sërë planesh për të trajtuar koston spirale të jetesës, duke përfshirë kuponat e ushqimit dhe përfitimet e zgjeruara. Një tjetër reformë e madhe është rritja graduale e moshës së pensionit nga 62 në 65 vjeç, e cila ka rezultuar e papëlqyeshme për pjesën më të madhe të elektoratit. Qëllimi është të “ndërtohen zgjidhje për t’i shërbyer francezëve” në një kohë kur nuk ka “shumicë alternative” ndaj asaj të aleancës qeverisëse të Macron, i tha AFP një zyrtar presidencial, i cili kërkoi të mos përmendet emri.
Kundërshtarët nga e djathta dhe e majta synojnë t’i rezistojnë programit të reformave të presidentit, megjithëse tubimi kombëtar i zonjës Le Pen ka thënë se mund të mbështesë masat, për të lehtësuar krizën e kostos së jetesës nëse propozimet e tyre miratohen.
Burimi i lajmit: BBC. Përshtatur nga Tirana Today
