Partitë politike maqedonase kanë hyrë në garë tashme për të fituar votat e elektoratit shqiptar për zgjedhjet lokale që do të mbahen në tetor.
Në këto zgjedhje, risi paraqet partia maqedonase në opozitë OBRM-PDUKM, e cila udhëhiqet nga ish-kryeministri Nikolla Gruevski dhe shquhet për idetë nacionaliste në garën për të fituar qytetin e Shkupit, ku ka premtuar se nëse fiton kandidati i kësaj partie Koce Trajanovski edhe një mandat, do të vendoset për herë të parë zëvendëskryetar të Shkupit një shqiptar.
Koce Trajanovski kërkon të bëhet kryetar i qytetit të Shkupit për të tretën herë me radhë. Ai është shfaqur në bilbordet e qytetit bashkë me Muhamet Ahmetin, kandidat për këshilltar në listën e OBRM-PDUKM-së, i cili është njëkohësisht edhe kandidat për zëvendëskryetar të qytetit të Shkupit, nën sloganin e shkruar shqip: “Fillon epokë e re në Shkup”.
Megjithatë, njohësit e çështjeve politike thonë se qytetarët shqiptarë vështirë se do t’i besojnë OBRM-PDUKM-së:
“OBRM-PDUKM si parti ishte ajo e cila tërë kohën ka kundërshtuar shumë çështje që prekin interesat e qytetarëve shqiptarë dhe tani përnjëherësh në fushatë zgjedhore del me idenë duke promovuar një epokë të re edhe për shqiptarët , kjo tek qytetarët më nuk kalon.
Për çështje të ndjeshme, që kanë të bëjnë me raportet mes shqiptarëve dhe maqedonasve nuk mund të veprohet në bazë të interesave të politikës ditore. Si e para, OBRM-PDUKM duhet të reformohet si parti, që të fillojnë t’i besojnë fillimisht maqedonasit dhe pastaj shqiptarët”, thotë Nikolla Dujovski, ligjërues i shkencave politike në Shkup.
Nga ana tjetër, kreu i Akademisë Shqiptare Amerikane e Shkencave dhe Arteve me seli në Shkup, është shprehur se elektorati shqiptar është drejtuar nga partitë maqedonase si rrjedhojë e dështimit të partive shqiptare, por pavarësisht dështimeve ky orientim paraqet rrezik për artikulimin e kërkesave të shqiptarëve.
“Nuk duhet të harrojnë shqiptarët se në këtë shtet ende trajtohen si qytetarë të rendit të dytë, si qiraxhinj në shtëpinë e vet, me status të pakicës kombëtare. Ky fakt nuk i jep komoditetin askujt të bëjë eksperimente me çështjen kombëtare të shqiptarëve në Maqedoni, sepse vetvetiu pas vetes bart rreziqe të tjera, për shfaqjen e tendencave për ndarjen e Maqedonisë, copëtimin e saj mes shteteve fqinje dhe zhbërjen përfundimtare të këtij shteti”, thotë Mehmeti, raporton Telegrafi.
Lidhja Social Demokrate e Maqedonisë e drejtuar nga kryeministri Zoran Zaev, në zgjedhjet e kaluara parlamentare arriti të sigurojë një numër të konsiderueshëm të votave në vendbanimet e banuara kryesisht me shqiptarë.
Kjo parti në zgjedhjet lokale të 15 tetorit garon me një kandidat shqiptar në komunën e Haraçinës së Shkupit, ndërkohë që në komunat e tjera shqiptare ka ftuar elektoratin e saj të mbështesë kandidatët e BDI-së si partner koalicioni, dhe në këmbim pret që votat e elektoratit të BDI-së të orientohen në kandidatin e socialdemokratëve për qytetin e Shkupit.
