Procesi i numërimit ka filluan në disa qarqe të vendit por nuk duhet harruar se si shkoi sot procesi i votimit. Edhe gjatë këtyre votimeve kishte incidente të ndryshme në disa qytete të vendit.
Në fshatin Ahmetaq, Vorë Behar Fjora ka përplasur me makinë Sherif Kajmakun pas një konflikti për motive politike mes tyre. I lënduari është dërguar menjëherë në spital nga ku mësohet se është jashtë rrezikut për jetën.
Ndërkohë në fshatin Shalës të Cërrikut është ndërprerë votimi për disa minuta pasi votuesi Ylli Perisnaka ka kërcënuar kryetaren e KZAZ nr.46, shtetasen me iniciale M.M. Një tjetër denoncim është bërë në Delvinë nga kandidati për deputet i LSI, i cili ka deklaruar se ka denoncuar një votuese të cilën e ka vërejtur duke hedhur në tokë dy fletë të ngjashme me ato të votimit me pretendimin se kanë qenë të falsifikuara.
Edhe PS ka bërë kallëzim penal për vëllanë e Klemend Balilit, Bako Balili i cili dyshohet se i jepte 50 euro në këmbim të çdo vote.
Një tjetër rast është shënuar në Vlorë ku një 59-vjecar i cili nuk ka mundur të ushtrojë të drejtën e votës pasi me të dhënat e tij kishte votuar dikush tjetër më herët.
Seksioni i krimit ekonomik ka nisur menjëherë procedimin penal për rastin.
Kryetari i KZAZ nr. 52, në Librazhd së bashku me një anëtar të KZAZ janë konfliktuar ndërmjet tyre dhe është kërkuar ndërhyrja e policisë.
Jashtë QV. 2345, është rrëshqitur komisoneri Arben Kercyku, i cili ka qenë në gjendje të dehur. U shoqërua në spital, nuk ka lidhje me procesin e votimit.
