Kryeministri i vendit Edi Rama deklaroi se vendi nuk do të shkojë në zgjedhje të parakohshme në rast se Këshilli Europian nuk hap negociatat për anëtarësim në Bashkimin Evropian.
I ftuar në “Open”, shefi i qeverisë shtoi se nëse BE jep nesër një përgjigje negative, dielli do të lindë sërish dhe qeveria do vijojë të punojë siç ka bërë deri më tani.
“Shqipëria nuk ka pse shkon sepse ka marrë po e Gjermanisë dhe vendeve dërrmuese, i ka bërë të gjitha detyrat… zgjedhje të parakohshme në Shqipëri nuk zgjidhin problemin e Gjermanisë dhe Francës se nëse do ta bënte atëherë do ta mendoja seriozisht të shkoja në zgjedhje”, u shpreh Rama.
Ndër të tjera, kryeministri theksoi se në takimin e ministrave të Jashtëm të BE-së nuk ka pasur vende kundër Shqipërisë dhe pro Maqedonisë.
“Kjo është e pavërtetë, nuk ka pasur vende pro Maqedonisë dhe kundër Shqipërisë, shumë pak vende kanë qenë, dhe kancelaria gjermane nuk ka qenë kurrë për ndarjen, dhe u shfaq në 6 mujorin e parë kur këtu u bë nami, kur u fut në mes e gjitha balta që iu hodh në Berlin përmes linjës partiake, që e pastruam falë komunikimin intensiv të CDU që në fund të ditës mbështet Shqipërinë.
Pas qershorit, gjasat që të ndodhte ndarja ishin të mëdha për shkak të atyre që ndodhen këtu, por pas qershorit ne kemi komunikuar, dhe falë respektit të Merkel që ka për vendin tonë dhe punën tonë ka bërë që Gjermania të jetë kundër ndarjes”, shtoi Edi Rama.
