Balla dhe Alibeaj kanë rënë në dakordësi që deri në raundin e tretë të propozojë vetëm opozita. Mazhoranca ka rënë dakord me draftin e kreut të Grupit Parlamentar të PD-së Enkelejd Alibeaj, për kushtet dhe kriteret për zgjedhjen e Presidentit. Kjo do të thotë se në tre raundet e para, ekskluzivitetin për të propozuar kandidatë do ta ketë vetëm opozita dhe më pas në të katërtin e të pestin, mazhoranca mund të shohë nëse do që të bëjë propozime.
Enkelejd Alibeaj: Mendja juaj është raundi i katërt dhe i pestë. Meqë keni lëshuar në eter sinjale bashkëpunimi dhe konsensusi, iu përgjigjëm. Ndërkohë, zonja në krahun tënd thotë; po, po dhe në fund të na hiqni të drejtën e propozimit. Të drejtën na e jep Kushtetuta. Me 20 firma propozohet një emër, depozitohet në administratë, mblidhet Komisioni i Ligjeve dhe vazhdon historia si vazhdon. Ne flasim për një gjë tjetër. 3 raundet e para propozimi të jetë i opozitës. Pikë! Asgjë më shumë. Kështu që nëse duam ta mbyllim, e mbyllim me një gjë fare të thjeshtë. Jeni dakord me dokumentin që iu kemi dhënë juve dhe kolegëve të tjerë? Kaq e thjeshtë.
Taulant Balla: Po! E zgjidhëm. Ramë dakord. Deri në raundin e tretë, propozimet i keni ju. Silni propozimet. Ne të tre thamë të njëjtën gjë sa herë morëm fjalën. Deri në raundin e tretë ju keni të drejtën e propozimeve. Ne nuk po propozojmë deri në raundin e tretë. Sillni propozimet. I doni siç tha zoti Gjiknuri. Bëjeni si të doni ju. Mos harroni, nëse doni të konsultoni ndonjë emër e ne thjesht na thoni kur. Nëse doni të ecni në mënyrë ekskluzive ju përsëri dhe kjo është. Atëherë ramë dakord. Pranohet dokumenti juaj deri në raundin e tretë. Raundin e katërt e ka thënë Kushtetuta si zgjidhet.
Enkelejd Alibeaj: Po! Por ki parasysh një gjë. Çdo shkelje, siç e ke lexuar në dokument i këtyre rregullave është shkelje e marrëveshjes.
