Kryetari i Grupit Parlamentar i PS, Taulant Balla, ka zbardhur se çfarë është diskutuar brenda Grupit Parlamentar, ku është ndalur edhe tek çështja e Presidentit. Ai sqaroi për mediat se deputetëve në Grupin Parlamentar i është kërkuar që të bëjnë propozime konkrete për emrin e ri të Presidentit, qoftë edhe konfidenciale. Brenda Grupit Parlamentar të PS kanë filluar konsultimet për emrin e Presidentit të ri të Republikës.
“Çdo deputet i PS gjatë fundjavës duhet të jetë prezent në territor dhe për të marrë vendimet që lidhen me angazhimet që lidhen me javën pasardhëse. Në 31 mars është seanca e radhës e Kuvendit, kemi diskutuar për çështjet e rendit të ditës.
Po afron dita që në konferencën e kryetarëve duhet të ketë një kalendar për zgjedhjen e Presidentit. Jo më vonë se 60 ditë, pra jo më vonë se 24 maji duhet të ketë filluar procesi për zgjedhjen e Presidentit.
Dëshira jonë është që ky të jetë një proces i hapur dhe bashkë me mua si kryetar i Grupit Parlamentar do të jetë Spiropali dhe Gjiknuri si të mandatuar për tu konsultuar me grupet e tjera parlamentare, që është i interesuar për një dialog konstruktiv.
Deputetëve i është kërkuar që të vijnë me propozime konkrete, konfidenciale nëse duan me qëllim që ne të kemi gati në një kohë një short listë të atyre që mund të jenë kandidaturat e mundshme”, tha Balla.
