Gjatë mbledhjes së Komisionit të Ligjeve, aty ku u diskutua për zgjedhjen e Presidentit, kreu i Partisë Republikane, Fatmir Mediu, kërkoi nga opozita që të gjejë konsensusin brenda partisë dhe të vijë në diskutime me emra konkretë. Mediu vuri në dukje se retorikat duhen lënë jashtë Komisionit, dhe të diskutohet për persona që janë të denjë për postin e Presidentit. “Mendoj që çështja e diskutimeve solemne ka ardhur në një fazë konkrete.
Sot ishte dita e parë që Kuvendi të shqyrtonte kandidaturat. Kriteret i përcaktojmë sipas figurës që propozojmë. Një përfaqësues i unitetit të popullit. Kushtetuta ka përcaktuar një procedurë të saktë për konsensus, për të pasur një President mbi palët. Dy raundet e fundit jepen vetëm në rastin kur opozita kërkon krizë politike.
Ky është momenti i reflektimit të opozitës, që të gjejë brenda vetes konsensusin për të gjetur figurat që plotësojnë sipas bindjes tonë, kriteret për tu bërë President. T’i lëmë retorikat, të diskutojmë rreth emrave konkretë. T’i japim dinjitet Presidentit të vendit. Ky diskutim të jetë i fundit në Komision”, tha Mediu.
