Kreu i Policisë Kriminale, Tonin Vocaj ka mbledhur sot zv/drejtorët e qarqeve ku i pranishëm ka qenë edhe drejtori i përgjithshëm Ardi Veliu. Kjo mbledhje pason pas ngjarjeve kriminale të ditëve të fundit.
Mbledhja është fokusuar në analizën e direktivave të dhëna më herët, ndërsa Zv/drejtorët po raportojnë për rezultatet. Kjo mbledhje pason pas paralajmërimit të Ministrit të Brendshëm, Bledi Çuçi, i cili u shpreh 2 ditë më parë se do të ketë ndryshime në postet e larta drejtuese të Policisë së Shtetit.
Një paralajmërim i tillë u bë edhe nga ana e kryeministrit Rama. Dje, me anë të një deklarate për mediat, Rama tha se Policia e Shtetit nuk jep dënimin, por reagon për një shkelje të caktuar dhe e çon atë para gjykatës.
Kryeministri u shpreh se gjyqtarët janë ata, të cilët nuk japin dënimin e merituar ndaj këtyre rasteve. Sipas tij, këta gjyqtarë duhen demaskuar sepse nuk janë duke bërë detyrën e tyre. Sa i takon ristrukturimit të Policisë së Shtetit, kreu i qeverisë deklaroi se ky proces ka nisur intensivisht. Rama pohoi se ndryshimi në nivele të larta të Policisë së Shtetit do të bëhet më herët nga ç’ishte planifikuar.
