Nënkryetari i Bashkisë së Tiranës, Arbian Mazniku tha sonte se është keqkuptuar premtimi i kryebashkiakut Erion Veliaj për zero ndërtime në Tiranë. I ftuar në emisionin “Tonight Ilva Tare” Mazniku sqaroi se janë shitur apartamentet ndaj dhe në Tiranë janë dhënë leje të reja ndërtimi.
“Deklaratat e tij më së shumti kanë dalë jashtë kontekstit. Ai thotë për sa kohë nuk ka një plan urbanistik dhe për sa kohë nuk do të sistemohet stoku i banesave nuk do të japim leje. Ne për herë të parë futëm në Tiranë zonën e Kasharit, zonën e parkut dhe zonën e Dajtit. Në atë kohë kishte 8-9 mijë apartamente të pa shitura. Janë shitur ato dhe shumë të tjera.
Në qoftë se dikush shkon në zonën e Astirit, çmimi është mbi 100 euro më shumë se një vit më parë. Apartamentet janë shitur.
Katër vjet më parë, kryesisht komunat Farkë, Kashar, Dajt kishin dhënë një sasi të madhe lejesh, që defakto funksionon si leje të qytetit të Tiranës.
Deri sot janë dhënë nga Bashkia e Tiranës 550 mijë metra katror ndërtim i ri në qytetin e Tiranës. Vetëm në 2014, Basha ka dhënë 770 mijë ndërtime. Pavarësisht se ka një debat për kullat, volumi është më i ulët”, deklaroi Mazniku.
