Ish-deputetja e PD-së, Grida Duma ka reaguar pas thirrjes që kryeministri Rama u drejtoi studentëve, duke ofruar zerim tarife dhe bursë njëvjeçare për këdo që do të denonconte korrupsionin e pedagogëve.
E ftuar në Ora News, Duma e cilësoi këtë thirrje si një blasfemi duke thënë se vendi është shkatërruar nga spiunazhi dhe shton se deklarata e Ramës është e rrezikshme dhe është bërë vetëm për show.
“Ka një blasfemi që është blasfemi e besimit në teologji, ka një blasfemi që është blasfemia e besimit në institucione. Nuk ka shembje më të madhe sesa i bëhet institucioneve vetëm me një deklaratë të tillë. Mos të flasim që shembet shpirti njerëzor kur numri një i ekzekutivit, kryeministri, bën thirrje për spiunazh. Nuk ka spiunazh më, nuk jetohet me spiunë. Ky vend është shkatërruar nga spiunazhi. Të bësh një thirrje të tillë sot, pavarësisht se besoj se është show, nga ana tjetër është e rrezikshme. Ai që të shtyn për të bërë këtë është fajtori. Është një blasfemi që nuk mund të realizohet”, u shpreh ish-deputetja.
