Qeveria e Holandës e drejtuar nga Mark Rutte, i ka dërguar një letër Parlamentit për çështjen e vendimit për Shqipërinë dhe Maqedoninë e Veriut për hapjen e negociatave.
Në letër theksohet se hapja e negociatave të anëtarësimit të Shqipërisë me Bashkimin Evropian është e parakohshme, teksa përmend si kushte krimin dhe ngritjen e prokurorisë së posaçme.
Qeveria i kërkon Parlamentit të jetë fleksibël dhe kërkon hapësirë për të negociuar më 16 tetor dhe se Shqipëria është prematurë për hapjen e negociatave.
“Qeveria mirëpret hapat që Shqipëria ka ndërmarrë tashmë në fushën e vetting-ut radikal, në sundimin e ligjit, rritjes së operacioneve policore kundër krimit. Por Shqipëria duhet të bëjë më shumë në luftën kundër krimit të organizuar.
SPAK duhet të jetë sa më shpejt funksional dhe Shqipëria të tregojë një rekord bindës në luftën kundër krimit të organizuar dhe korrupsionit. Për të përfunduar, Qeveria mendon se hapja tani e negociatave është e parakohshme”, thuhet në një letër të publikuar nga Top Channel.
