Qeveria shqiptare ka vendosur të bëjë lëvizjen e parë për zgjidhjen e mosmarrëveshjeve me Greqinë. Kështu, duket se vizita e ministrit të Jashtëm Ditmir Bushati në shtetin helen ka bërë që mes palëve të ketë disa pikë për të cilat ata kanë rënë dakord, një prej të cilave është ndërtimi i varrezave të reja për ushtarakët grekë të rënë gjatë luftës së viteve 1940-1941.
Vendimi është marrë nga Këshilli i Ministrave, në mbledhjen e fundit të mbajtur më 13 dhjetor. Ky kusht ka qenë ndër kryesoret që ka vendosur gati çdo qeveri greke në bisedimet greko-shqiptare.
Ministrat e jashtëm të Greqisë e Shqipërisë, Kotzias e Bushati përfunduan takimin treditor në Kretë në fillim të muajit nëntor, pra para një muaji.
Në përfundim të takimit ata hartuan një deklaratë të përbashkët, ku flitet me terma të përgjithshëm se është bërë një punë esenciale në drejtim të zgjidhjes së problemeve të hapura dypalëshe.
Në deklaratë nuk flitet konkretisht mbi çështjet e debatueshme që karakterizojnë marrëdhëniet midis Tiranës dhe Athinës, por vetëm thuhet se takimi i Kretës ishte një hap i rëndësishëm përpara.
Ndërkohë, të dy ministrat kanë rënë dakord për një takim tjetër, me format të ngjashëm, që do të mbahet muajt e ardhshëm në Shqipëri.
