Një 34-vjeçar u gjet pa shenja jete në Fushë-Krujë. Burimet zyrtare të policisë thonë se viktima, Indrit Ndoj, u gjet rreth orës 08:20 në lagjen Bakishe Visha, në një rrugë dytësore. Nga kqyrja paraprake është konstatuar se 34-vjeçari ka një dëmtim në këmbë, që dyshohet të jetë shkaktuar nga armë zjarri. Viktima mësohet se është banues në fshatin Hasan të Krujës.
Burimet paraprake, ende jo zyrtare bëjnë me dije se Indrit Ndoj është gjetur në një kanal, anash rrugës nga familjarët e tij, të cilët kanë dalë në mëngjes për të shkuar në punë dhe rastësisht kanë parë të afërmin e tyre në kanal.
Ngjarja dyshohet të ketë ndodhur natën, pasi i riu banonte në një shtëpi në fshatin Hasan i vetëm, ndërsa familja në një banesë në lagjen Bakushe Visha.
Indrit Ndoj rezulton person me precedentë penalë. Ai është vënë në pranga në shtator të vitit të kaluar për transport të paligjshëm të emigrantëve. Ai u arrestua bashkë me një person tjetër në Skuraj të Kurbinit, duke transportuar me dy automjete 19 emigrantë drejt Kosovës.
